Obituaries

ՆԱՐԵԿ ՆԱԶԱՐՅԱՆ

մահախոսական

Լուրը բոլորիս տակն ու վրա արեց.Անասելի խորն է այս ցավը , անհամատեղելի է կյանքի հետ ։

Ոչ մի կերպ չենք կարողանում հաշտվել այն մտքի հետ, որ Նարեկը այլևս մեզ հետ չէ։ Այո, նա մեզ հետ չէ․ Այլևս հավերժությունն է նրա տունը ։ Աշխարհը մեզ համար անդառնալի կերպով փոխվեց . այժմ այս աշխարհում արևի շողը առաջվա պես չի բացվի մեզ համար ։ Եվ հիմա արդեն, ստիպված ենք մի ելք գտնել, ուժ և հավատք, ապրելու նրա բացակայությամբ:

2003 թ - ի Փետրվարի 26 - ին , մայրաքաղաք Երևանում , Արսեն և Մակա Նազարյանների տանը ուրախություն էր, մեծ ուրախություն․ լույս աշխարհ էր եկել անդրանիկ զավակը ՝ Նարեկը ։ Նրանց երջանկությունը ասես սահմաններ չուներ ։ Եվ հենց այդ օրից էլ նրա հետ կապվեցին սիրասուն ծնողների անվերջ թվացող երազանքներն ու ապագան ։ Նրանով էր բացվում առավոտը և նրանով վերջանում ամեն մի օրը ։ Ժպիտ պարգևող , աշխույժ ու ժպտերես Նարեկը վայելում էր սիրելի ծնողների սերն ու հոգատարությունը ։ Մանկության երջանիկ ու անհոգ օրերը անցնում են մեկը մյուսի ետևից , անցյալում թողնելով միայն ժպիտ ու մանկական խենթություններ ։ Երեք տարի անց Նազարյանների տունը կրկին լցվում է մանկան ճիչով , Տերը նրանց է պարգևում չքնաղ Նատալիին ։ Նարեկը յուրակատուկ սիրով և խնամքով էր վերաբերվում սիրելի քրոջը և նրա համար եղավ սիրելի եղբայր ու պաշտպան ։ Երեխաները հասակ էին առնում ծնողական անսահման սիրո և հոգատարության մտնոլորտում ։ Փոքրիկ Նարեկը 2009 թվականից սկսեց հաճախել Երևանի Մովսես Խորենացու անվան թիվ 143 դպրոց ։ Նա հիանալի աշակերտ էր, ընդունակ ու խելացի, ով ողջ ուսմնական տարիների ընթացքում ցուցաբերում էր բարձր առաջադիմություն և յուրաքանչյուր տարվա վերջում պարգևատրվում էր գովասանագրով ։

Նարեկը առաջադեմ էր ու նպատակասլաց, ձգտող և բարեկիրթ ։ Դրա համար էլ բոլոր ուսուցիչներն ու աշակերտները նրան սիրում էին առանձնահատուկ կերպով ։

2017 թ - ին Նազարյանների ընտանիքը տեղափոխվում է Ամերիկայի Միացյալ Նահանգներ ։ Այստեղ էլ Նարեկը շարունակում է իր ուսումը և ընդունվում La Crescenta - ի Valley ավագ դպրոցը ։

Դպոցն ավարտելուց անմիջապես հետո Նարեկը աշխատանքի է ընդունվում Բեվերլի Հիլլզ - ի LEXUS ընկերությունում և այդ ընթացքում շարունակում է իր կրթությունը Glendale Community College- ում : Այնտեղ նույնպես Նարեկը ցուցաբերում է բարձր առաջադիմություն և դառնում բոլորի կողմից սիրված աշակերտ ։ Նարեկի ձգտումներն ու երազանքները անվերջ էին ։ Նա համառ էր իր որոշումների մեջ, ինչը և օգնում էր նրան չկոտրվելու և առաջ գնալու ։

2022 թ - ին Glendale Community College- ն ավարտելուն պես ընդունվում է Woodbury համալսարան և զուգահեռաբար աշխատում է National Auto ընկերությունում ։ Բոլորը գիտեին , որ Նարեկը նպատակասլաց գեղեցիկ երազներով պետք է մտներ մեծ կյանք , դառնալով իր ծնողների հպարտությունը ։ Նա հիանալի զավակ էր , սիրելի եղբայր , հուսալի ընկեր և ամուր հենասյուն իր ընտանիքի համար ։ Նարեկը դեռ երկար ճանապարհ ուներ անցնելու և իրականացնելու բոլոր այն երազանքները, որ կապված էին իր հետ ։ Ցավոք , չարագույժ դիպվածը ընդհատեց նրա գարուն կյանքը Դեկտեմբերի 11 - ին , ծանր բաժանման ցավն ու վիշտը թողնելով իր ընտանիքին ու հարազատներին ։ 19 գարուն միայն ապրած, իր կյանքն ու նպատակները անավարտ թողած հեռացավ աշխարհից, տանելով իր հետ մի ամբողջ աշխարհ ։ Մեր անգին գանձ, առանց քեզ մեր աշխարհն ու կյանքը էլ երբեք նույնը չեն լինելու ։ Քեզ պահելու ենք մեր սրտերում, թանկ հիշատակներդ փայփայելու ենք քանի կանք ։